Esports News
ໃນວັນທີ 30 ເມສາ 2025 ທີ່ຜ່ານມາ, ທ່ານ ໂຈນາທານ ສິລິສັກດາ, ປະທານສະຫະພັນກິລາອີສະປອດແຫ່ງຊາດລາວ, ໄດ້ນຳພາ ທ້າວ ສຸທິພອນ ສິງທອງ, ນັກກິລາອີສະປອດປະເພດ Efootball ຂອງທີມຊາດລາວ, ເພື່ອເຂົ້າຮ່ວມການແຂ່ງຂັນລະດັບສາກົນທີ່ມີຊື່ວ່າ “WAVES Esports Championship 2025 – eFootball International Leg” ເຊິ່ງຈັດຂຶ້ນ ທີເມືອງ ມຸມໃບ, ປະເທດ ອິນເດຍ.
ການເດີນທາງໄປເຂົ້າຮ່ວມການແຂ່ງຂັນຄັ້ງນີ້ ເປັນການສ້າງໂອກາດອັນສຳຄັນໃຫ້ແກ່ນັກກິລາອີສະປອດຂອງລາວ ໄດ້ສະແດງສັກກະຍະພາບໃນເວທີສາກົນ ແລະ ເປັນການສົ່ງເສີມກິລາອີສະປອດໃນປະເທດລາວໃຫ້ກ້າວໄປສູ່ລະດັບພາກພື້ນ ແລະ ສາກົນ. ທ້າວ ສຸທິພອນ ສິງທອງ ເປັນນັກກິລາທີ່ມີຄວາມສາມາດ ແລະ ໄດ້ຜ່ານການຄັດເລືອກ ເພື່ອເປັນຕົວແທນຂອງປະເທດເຂົ້າຮ່ວມການແຂ່ງຂັນໃນລາຍການດັ່ງກ່າວ.
ທ່ານ ໂຈນາທານ ສິລິສັກດາ ໄດ້ກ່າວວ່າ “ການເຂົ້າຮ່ວມການແຂ່ງຂັນ WAVES Esports Championship 2025 ໃນຄັ້ງນີ້ ເປັນບາດກ້າວສຳຄັນໃນການພັດທະນາກິລາອີສະປອດຂອງລາວ. ພວກເຮົາເຊື່ອໝັ້ນໃນຄວາມສາມາດຂອງ ທ້າວ ສຸທິພອນ ແລະ ຫວັງວ່າລາວຈະສ້າງຜົນງານທີ່ດີ ເພື່ອນຳຊື່ສຽງມາສູ່ປະເທດຊາດ.”
ສະຫະພັນກິລາອີສະປອດແຫ່ງຊາດລາວ ຂໍເຊີນຊວນແຟນໆ ກິລາອີສະປອດທຸກຄົນຮ່ວມສົ່ງກຳລັງໃຈ ແລະ ເປັນກຳລັງເຊຍໃຫ້ແກ່ ທ້າວ ສຸທິພອນ ສິງທອງ ແລະ ທີມຊາດລາວ ໃນການແຂ່ງຂັນລະດັບສາກົນຄັ້ງນີ້. ຕິດຕາມຂ່າວສານ ແລະ ຜົນການແຂ່ງຂັນໄດ້ຜ່ານຊ່ອງທາງຂອງສະຫະພັນກິລາອີສະປອດແຫ່ງຊາດລາວ.
ພວກເຮົາຂໍອວຍພອນໃຫ້ ທ້າວ ສຸທິພອນ ສິງທອງ ປະສົບຜົນສຳເລັດໃນການແຂ່ງຂັນ ແລະ ສາມາດສ້າງຜົນງານອັນໂດດເດັ່ນໃນເວທີສາກົນ.
