ກອງປະຊຸມ ວຽກງານກິລາລະດັບສູງທົ່ວປະເທດ ປະຈຳປີ 2023 ແລະ ແຜນວຽກງານຈຸດສຸມ ປະຈຳປີ 2024

ປະທານສະຫະພັນກິລາອີສະປອດແຫ່ງຊາດລາວ ໄດ້ສຳເລັດການເຂົ້າຮ່ວມກອງປະຊຸມສຳຄັນ, ກອງປະຊຸມດັ່ງກ່າວ ແມ່ນໄດ້ຈັດຂື້ນໃນວັນທີ 29 ມັງກອນ 2024 ທີ່ເມືອງວັງວຽງ ແຂວງວຽງຈັນ ພາຍໃຕ້ການເປັນປະທານຂອງທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ຜູ້ຊີ້ນຳວຽກງານກິລາ-ກາຍຍະກຳ, ມີທ່ານຫົວໜ້າກົມກິລາລະດັບສູງ, ຫົວຫນ້າກົມທີ່ກ່ຽວຂ້ອງ, ຮອງກົມ, ຫົວຫນ້າພະແນກສຶກສາທິການແລະກິລາແຂວງ, ນະຄອນຫຼວງວຽງຈັນ, ປະທານສະຫະພັນກິລາແຫ່ງຊາດລາວ, ຮອງປະທານ, ພະນັກງານ, ວິຊາການ ຈາກທົ່ວປະເທດເຂົ້າຮ່ວມທັງໝົດ 110 ທ່ານ.

ປະທານກອງປະຊຸມ ສະເຫນີໃຫ້ບັນດາຜູ້ແທນໃນກອງປະຊຸມຄັ້ງນີ້ ມີຄຳເຫັນ ແລະ ເອົາໃຈໃສ່ໃນການປະກອບສ່ວນໃສ່ເນື້ອໃນກອງປະຊຸມ ເພື່ອໃຫ້ເປັນວຽກງານຈຸດສຸມການພັດທະນາລາ ແລະ ກໍ່ຢາກໃຫ້ເອົາໃຈໃສ່ເລື່ອງການປະຕິບັດວຽກງານກິລາຂອງບັນດາສະຫະພັນກິລາແຫ່ງຊາດ, ຂະແຫນງການກິລາ-ກາຍຍະກຳແຂວງ ແລະ ສະຖາບັນກິລາ-ກາຍຍະກຳ ຈົ່ງປະຕິບັດທຸກຢ່າງໃຫ້ປອດໃສ ແລະ ລະອຽດ ບໍ່ໃຫ້ມີຈຸດອ່ອນ ແລະ ສົ່ງຜົນກະທົບຕໍ່ການປະຕິບັດວຽກງານ. ສ່ວນເລື່ອງການເບີ່ງແຍງນັກກິລາທີ່ຮັບໃຊ້ຊາດ, ສະໜາມກິລາຕ່າງໆ ລວມເຖີງການຫັ້ນກິລາກ້າວສູ່ເປັນອາຊີບ ແມ່ນຢາກໃຫ້ສົມທົບກັບພາກສ່ວນກ່ຽວຂ້ອງ ຄົ້ນຄວ້າແລະປຶກສາຫາລືກັນ ໃຫ້ຖືກຕ້ອງ ແລະ ມີວິທີການທີ່ເປັນໄປໄດ້ທີ່ສຸດ. ພ້ອມກັນນັ້ນ ທ່ານຍັງໄດ້ເນັ້ນຫນັກ ແລະ ຢາກໃຫ້ເອົາໃຈໃສ່ທີ່ສຸດ ກໍ່ຄືການສຸມໃສ່ ແລະ ຕັ້ງຫນ້າປະຕິບັດໃຫ້ສຳເລັດ ແລະ ປາດສະຈາກໃຫ້ ລົ້ມກິລາ ຫລື ການຊື້ຈ້າງ ເພາະນີ້ເປັນສີ່ງທີ່ທຳລາຍຊື້ສຽງແລະກຽດຂອງພວກເຮົາ ທັງຢູ່ພາຍໃນ ແລະ ໄປແຂ່ງຂັນຕ່າງປະເທດ ອີກດ້ວຍ.

ນອກຈາກວຽກງານໂດຍລວມ ຍັງໄດ້ມີການປຶກສາຫາລືແຜນຈຸດສຸມປີ 2024 ແລະ ວາງແຜນ ກິລາແຫ່ງຊາດ ໃນປີ 2025 ເຊິ່ງ ອີສະປອດ ເປັນ 1 ໃນກິລາທີ່ຖືກກ່າວເຖິງໃນກອງປະຊຸມ ແລະ ໂດຍສະເພາະມີແຜນ ເຂົ້າບັນຈຸ ກິລາມະຫາວິທະຍາໄລລາວ ແລະ ກິລາ ນັກຮຽນທົ່ວປະເທດ.

ທັງນີ້ ສະຫະພັນກິລາອີສະປອດ ຍັງຈັດຢູ່ໃນໝວດກິລາທີ່ຕ້ອງຂົນຂວາຍ ກຸ້ມຕົນເອງໃນຫລາຍດ້ານ ຈຶ່ງຈຳເປັນຕ້ອງປຶກສາກັບ ຄະນະນຳ ແລະ ແລກປ່ຽນກັບຫລາຍພາກສ່ວນ ໂດຍສະເພາະ ພາກສ່ວນ ພະແນກສຶກສາທິການ ແລະ ກິລາແຂວງ ທີ່ຈຳເປັນຕ້ອງວາງແຜນຮ່ວມກັນຢ່າງຮັດກຸມ ຮັບປະກັນ ການຂະຫຍາຍ ໄປເທື່ອລະກ້າວ ເທື່ອລະດ້ານ.

ນອກຈາກນີ້ກອງປະຊຸມ ຍັງໄດ້ຜ່ານຮ່າງບົດຕ່າງໆ ປະກອບມີ ຜ່ານຮ່າງແຜນຍຸດທະສາດການພັດທະນາກິລາລາວ ແຕ່ນີ້ເຖີງ ປີ 2030 ແລະ ວິໄສທັດຮອດປີ 2050, ຜ່ານຮ່າງປັບປຸງດຳລັດ ວ່າດ້ວຍລະບອບນະໂຍບາຍຕໍ່ນັກກິລາ ແລະ ຄູຝຶກທີມຊາດ (ສະບັບປຸບປັງ), ຜ່ານຮ່າງຂໍ້ຕົກລົງ ວ່າດ້ວຍການຄຸ້ມຄ້ອງ ແລະ ເຄື່ອນໄຫວສະຫະພັນ-ສະໂມສອນກິລາ, ຜ່ານຮ່າງຂໍ້ຕົກລົງວ່າດ້ວຍການນຳໃຊ້ຊຸດເຄື່ອງແບບກິລາ-ກາຍຍະກຳ ແລະ ຜ່ານຮ່າງຂໍ້ຕົກລົງວ່າດ້ວຍການຈັດຕັ້ງ, ເຄື່ອນໄຫວສະໜາມກິລາ-ກາຍຍະກຳຂັ້ນແຂວງ.

Cr ຂ່າວ ແລະ ຮູບພາບຈາກ ກົມກິລາລະດັບສູງ.